John Rotluangliana chuan, Kum 2023 MLA inthlanah thalai ten ZPM boruak an pu darh a, tun Dampa bial By election ah erawh Congress Party zawmtu tam ber leh Congress party boruak pu darhtu chu thalai an ni leh tawh, tih sawiin, "Mizoram hmun hrang hrangah ZPM sorkarah beiseina mipuiin an nei tawh lo," a ti.

Nasa takin kum 2023 MLA inthlanah thu an tiam a, kan ti ve lovang an tih zawng zawng ti leh vekin kan ti ang an tih zawng zawng an ti lo vek thung. Thil tam tak an tiam a, an thutiam hlen si loh sawimam chu ZPM sorkar hmalakna awmchhun a ni, a ti bawk.

Congress sorkar thuai thuai turah duhtute phone call chhangin kan hmanhlel. A bul tan nan Dampa bialin Congress an koa, Dampa bial hi Pathianin Congress Party tan ram rawngbawl hna bul tanna tur atan min pek a ni tih hi kan pawm thlap a ni, a ti.

John Rotluangliana chuan, ZPM Candidate  Vanlalsailova hi Congress tan a hnawk miah lo. A tan hian ZPM party hi hling an ni. Chutiangin MNF party pawh tun hnaiah Pu Zoramthanga a hlim thar lutuk chuan headquarters leh Dampa biala an Candidate Dr. R. Lalthangliana leh an party nasa takin a ti hnual, tih a sawi bawk.

"ZPM leh MNF party leader Lalduhoma leh Zoramthanga hi By election leh kum 2028 MLA inthlanpui atana Congress Party Star Campaigner an ni. Anni pahnih hi an dam that kan duhsak takzet a ni. Tluang taka Zoram pum tlawha an zin theih phawt chuan chiang takin kum 2028-ah Congress kan sorkar ang," a ti bawk.

Minister hlui John Rotluangliana chuan, Congress a sorkar apiangin Ram rohlu kan neih belh a, Mizoramin a neih Mizoram rohlu hi Congress party hmalakna vek a ni a, ZPM leh MNF hmalakna Mizoram kan hmuh chu thlalak chauh a ni. Congress a sorkar chuan ram a ralmuang a, thlarau hlimna a thleng thin. MNF, ZPM leh Party dang an sorkar apiangin Mizoramin manganna kan tawk a, Kohhran thlarau nun a chau a, Ram rohlu siamna tur nasa takin suamsam a ni thin. 

Chuvangin kan ramah hian tute nge rintlak, an sorkar laia an thutiam hlenchhuak tute nge? An sorkar laia an thutiam tute nge bawhchhetu tih atangin Dampa bial leh Mizoram mipuiin tehna hmang turin ka ngen a ni, a ti.

John Rotluangliana chuan, Sumo seat in ken pawh harsa kan tih laiin Congress Party chuan Mizoram mipui duhthusam remna leh muanna atan Chief Minister thutthleng kan kian thei. MNF leh ZPM chuan engkim an in chuh a, Dampa bial By election neih turah an headquarters atangin an Candidate duh leh duh lo an awm ve ve avangin seng khawm hna Congress party in kan thawk a ni, Dampa bial atang hian Congress in Mizoram hmasawnna hna thawh bul kan tan leh tawh dawn a ni, a ti bawk.